ការចូលព្រះវស្សានៅវត្តបទុមវតី

ថ្ងៃអាទិត្យ ១រោច ខែអាសាឍ ឆ្នាំរកានព្វស័ក ព.ស២៥៦១ ត្រូវនឹងថ្ងៃទី០៩ កក្តដា គ.ស២០១៧ ជាថ្ងៃដែលព្រះសង្ឃក្នុងព្រះពុទ្ធសាសនាទូទាំងពិពភលោកត្រូវចូលព្រះវស្សា៣ខែ

   វត្តបទុមវតី ជាវត្តដែលមានចំនួនព្រះសង្ឃច្រើនជាងគេ នៅក្នុងប្រទេសកម្ពុជា និងសម្បូរទៅដោយបញ្ញាវន្ត និងធម្មកឋិក ធម្មាចារ្យ ឧទ្ទេសាចារ្យ គង់នៅព្រមទាំងសិស្សនិស្សិត ក៏ស្នាក់នៅច្រើនជារៀងរាល់ឆ្នាំ ក្រោមការដឹកនាំរបស់សម្តេច ព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត និងព្រះមុនីកោសល ឃឹម សន​ ព្រះមេគណរាជធានីភ្នំពេញ ។​ ​  

ម៉ោង៤កន្លះល្ងាច ក្រោយពីសម្លេងរគាំងបន្លឺចប់ ក្នុងវិហារ វត្តបទុមវតី ពេញទៅដោយព្រះសង្ឍ ឯកសណ្ឋានក្រាក់ខ្នុរកំពុងតំរៀបជួរតាមលំដាប់ព្រះវស្សា និងផ្ទៀងផ្ទាត់ចំនួនតាមកុដិទាំង៣៨កុដិ មានព្រះសង្ឃ៤៨៥អង្គ មនស្សការព្រះរតនត្រៃ និងធ្វើកិច្ចវត្តចំពោះសម្តេចព្រះចៅអធិការ។

សម្តេចព្រះចៅអធិការបានប្រទានឱវាទទាក់ទងទៅនិងពិធីប្រតិបត្តិនៅក្នុងព្រះវស្សា និងការសាមគ្គីគ្នា បដិបត្តិតាមធម៌វិន័យព្រះពុទ្ធ ព្រមទាំងការថែរក្សាអនាម័យនិងបរិស្ឋាន។  សម្តេចអធិដ្ឋាន ចូលព្រះវស្សាមុនគេ បន្ទាប់មកព្រះសង្ឍជាថេរៈវស្សាចាស់ក៏អធិដ្ឋានបន្តបន្ទាប់គ្នា និងតាមលំដាប់ជួរ ទាំងអស់អង្គ ជាចុងក្រោយព្រះមន្ត្រីសង្ឃ ប្រកាសពេលវេលា ឡើងនមស្សការ ពេលព្រឹក ពេលល្ងាច ពេលសមាទានសីលនិង ធ្វើឧបោសថកម្ម ។

  បញ្ជាក់់៖ ការចូលព្រះវស្សាមិនមែនហៅថា បវារណាចូលព្រះវស្សាទេគឺហៅថាការអធិដ្ឋានចូលព្រះវស្សា ឯបវារណា គឺគេធ្វើតែនៅថ្ងៃចេញព្រះវស្សាប៉ុណ្ណោះ គេហៅថាបវារណាចេញព្រះវស្សា ជាឈ្មោះនៃសង្ឃកម្មគឺបវារណាកម្ម៕